नागपूर, दि. ११ डिसेंबर : पुणे महानगर क्षेत्रातील 220 विकास प्रकल्पांना 32 हजार 523 कोटी रूपयांचा निधी मंजूर करण्यात आल्याची माहिती मुख्यमंत्री देवेंद्र फडणवीस यांनी दिली. वाढत्या नागरीकरणाच्या पार्श्वभूमीवर शहरांना आवश्यक सुविधा देणे हे सरकारचे प्राधान्य असल्याचे त्यांनी सांगितले. रस्ते विकास आराखडा ठरवल्यानंतरच शहर विकासाची रुपरेषा अंतिम करावी, असेही त्यांनी सुचवले.
मुख्यमंत्री फडणवीस यांच्या अध्यक्षतेखाली विधानभवनात झालेल्या पुणे महानगर नियोजन समितीच्या पाचव्या सभेत उपमुख्यमंत्री एकनाथ शिंदे, उपमुख्यमंत्री अजित पवार, मंत्री चंद्रकांत पाटील आणि आमदार उपस्थित होते.
फडणवीस म्हणाले, पुणे महानगरासाठी ‘स्ट्रक्चर प्लॅन’ तयार करताना भविष्यातील लोकसंख्या व नागरीकरणाचा विचार करावा आणि प्रक्रिया गतीने पूर्ण करावी. विविध प्राधिकरणांच्या ऐवजी संपूर्ण क्षेत्राचा विकास एकाच प्राधिकरणाकडून व्हावा, असे त्यांनी स्पष्ट केले.
३० जून २०२१ मध्ये पुणे महापालिकेत समाविष्ट झालेल्या २३ गावांचे नियोजन PMC ने करावे. ‘पुणे ग्रोथ हब’चा आराखडा मित्रा संस्थेकडून करण्याबाबतही पडताळणीचा आदेश देण्यात आला. माण–म्हाळुंगे टाऊनशिपचे काम तसेच एकीकृत टाउन प्लॅनिंगच्या १५ योजनांची निश्चित कालमर्यादेत पूर्तता करण्याचे निर्देश देण्यात आले.
पुणे विद्यापीठाजवळील उड्डाणपूल लोकार्पणाची प्रतीक्षा न करता तात्काळ सुरू करण्यासही मुख्यमंत्री यांनी सांगितले. पुण्याचा ‘कॉम्प्रेहेन्सिव्ह मोबिलिटी प्लॅन’ सर्व सदस्यांच्या सूचनांवर आधारित तयार करावा असेही त्यांनी नमूद केले.
बैठकीस मुख्य सचिव राजेश अग्रवाल, अन्य वरिष्ठ अधिकारी तसेच विभागीय आयुक्त, PMC आयुक्त आणि जिल्हाधिकारी यांनी दूरदृष्य प्रणालीद्वारे सहभाग घेतला. पुणे महानगर आयुक्त योगेश म्हसे यांनी सादरीकरण केले.
पुणे महानगर प्रदेशात सुरू असलेली विकासकामे –
– 589 किलोमीटर लांबीच्या रस्त्यांची 127 कामे सुरू आहेत.
– शहरांतर्गत 83 किलोमीटर लांबीचा वर्तुळाकार रस्ता प्रकल्प सुरू आहे.
– पुणे शहरातील विकास केंद्र, औद्योगिक क्षेत्र आणि विमानतळ जोडणीसाठीचे रस्ते बांधकाम सुरू आहे.
– तीन पूल आणि उड्डाणपुलांची कामे प्रगतीपथावर आहेत.
– तीन गृहनिर्माण प्रकल्पांची कामे सुरू आहेत.
– पाणीपुरवठ्याच्या चार योजनांवर काम सुरू असून वाघोली पाणीपुरवठा योजना पूर्ण झाली आहे.
पुणे महानगर प्रदेशात लवकरच सुरू होणारी कामे –
– पवना, इंद्रायणी, मुळा आणि मुठा नद्यांच्या पुनरुज्जीवनाची तीन कामे
– चौकांमधील वाहतूक कोंडी कमी करण्यासाठी 17 प्रकल्प
– 10 पर्यटन विकास केंद्रांची कामे
– स्कायवॉक आणि मल्टी-मॉडेल हब प्रकल्पांतील पाच कामे
येरवडा–कात्रज भुयारी मार्ग –
– येरवडा ते कात्रज दरम्यान 20 किलोमीटर लांबीचा भुयारी मार्ग प्रस्तावित आहे.
– या महामार्गाच्या फिजिबिलिटी चाचणीचे काम सुरू आहे.
– या प्रकल्पासाठी अंदाजे 7 हजार 500 कोटी रुपयांचा खर्च अपेक्षित आहे.